Abdij va Mameles

Dit artikel is gesjreve in 't Norbiks. Ómdat 't plaatsgebónge is, maogs doe 't ómzètte nao 't Völzer, es te dit dialek sjpriks.

D'r Abdij va Mameles of d'r Abdij St. Benedictusberg liekt in 't gehuch Mameles in de gemèngde Vols en vervóng saer 1925 'ne abdij oet Merkelbeek, mieë bepaald oet De Kling. In 1922 waoërt mèt d'r boew van 't kloeëster begoes. D'r architect waor de:Dominikus Böhm. Bies d'r Twiede Weltkrèèg wónde d'r Duutsje Benedictiener monnike, die Duutsjlaand óntvlucht waore tiedens d'r Kulturkampf. Nao d'r krèèg waoërte de monnike oetgewaeze en waoërt 't kloeëster achterèènvolges bewónd dör Amerikaanse soldaote, pólletieke delinquente en oet Indonesië gerepatriëerde gezinne. Saer 1951 wert d'r abdij bewónd dör Nederlandse Benedictiene.

De abdijkèrk is va 1960 en óntwórpe dör Dom Hans van Laan, 'ne Benedictiener monnik-architect, dae va 1968 bies an z'ne doeëd in 1991 in d'r abdij wónde.